Burconews.net
Maxaa kala heysta Labada kooxood ee Manchester oo ciyaartooda la sugi la’yahay?
April 24, 2019 - Written by ilyas haruun

Pep Guardiola ayaa ka carooday hadal uu yidhi Ole Gunnar Solskjaer

Waxaa maanta si weyn loo hadal hayaa ciyaarta adag ee ay ku ballansan yihiin labada kooxood ee ka dhisan magaalada Manchester, United iyo City.

Ciyaataas la sugi la’yahay inta xilligeeda laga gaarayo ayaa saameyn ku yeelaneysa kala horreynta horyaalka Ingiriiska, iyadoo labada kooxood mid walba aysan ku qanci doonin wax aan badis ahayn.

Manchester City ayaa haddii laga guuleysto halis ugu jiri doonta inaysan qaadin horyaalka, oo iyadoo il libiqsi kaliya ay ka sugeyso Liverpool, halka Manchester United ay iyadana guul darrada u horseedi karto inaysan soo galin 4-ta kaalmood ee ugu horreeya, taasoo ka dhigan inay ka qaddo ka qeyb galka tartanka Champions League ee isu keena horyaallada Yurub.

Ciyaartan oo loo yaqaanno “Manchester Deby” ayaa ka dhici doonta garoonka kooxda United ee Old Trafford, arrintaasoo fursad aan la isku halleyn karin ay ugu jirto kooxda martida loo yahay.

Laba kooxood ayaa isku biro tumanaya waxaana natiijada kulankaas isha ku haya guud ahaan dadka daawada kubadda cagta adduunka.

Subaxnimadii Talaadada ayuu macallinka kooxda Manchester United Ole Gunner Solskjaer waxa uu ciyaartoydiisa u sheegay inay is adkeeyaan, maadaama ay hardan xoog leh kala kulmi doonaan ciyaartoyda City, kuwaasoo uu sheegay inay khaladaad badan ku gali doonaan.

Hase ahaatee hadalkaas ayaa ka careysiiyay tababaraha City Pep Guardiola, oo sheegay in kooxdiisu aysan ku xisaabtamnin inay ciyaartoyda kale jabiyaan.

Guardiola ayaa horay u beeniyay eedeyn loogu jeediyay inuu wiilashiisa kula soo dardaarmo inay wax lagdaan mar walba oo weerarka rogaal celis ah lagu qaado inta ay ciyaarta socoto.

Kulanka caawa ayaa noqonaya kii 160-aad ee ay isaga hor yimaadaan labada Manchester.

United ayaa guuleysatay 62 jeer halka City ay guuleysatay 46 jeer, waxayna labada kooxood barbarro galeen 51 jeer.

Balse, City ayaa hal mar oo kaliya guul darro kala soo laabatay toddobadii jeer ee ugu dambeysay ee ay booqatay garoonka Old Trafford.

Ciyaartoyda United ayaadse mooddaa inay aad uga careysan yihiin guul darradii argagaxa lahayd ee ay dabayaaqadii isbuuca kasoo qaadeen garoonka kooxda Everton, halkaasoo 4-0 lagu soo quusiyay, sidaas awgeedna dad badan waxay aaminsan yihiin in ay ku ciil furfuran karaan cid walba oo ka hor imaata iyagoo sidaas u xanaaqsan.

Waxyaabaha dhif iyo naadirka ah ee kulankan la socda waxaa ka mid ah in taageerayaasha kooxda Liverpool ay caawa la safan yihiin Manchester United, oo la wada ogyahay inuu kala dhaxeeyo xifaaltan cadaawad noqday.

Sababtuna waa inay doonayaan in loo qabto City si ay horyaalka u qaadaan.

COMMENTS
Latest News